يالله يالي بأمرك الرزق يقسم
ياخالق الدنيا ومحصي عددها
ترحم شجاعً للمواجيب يقدم
هو فخرنا بين الرجال و سعدها
يحي ولد سلمان للقوم محزم
رمز الصقور الي ينومس هددها
من يوم روح صابنا الهم والغم
وصدورنا ضاقت و كلن شهدها
هو صاحبً وافي رفيقً وبن عم
ركن القبيله يانشاما واسدها
حافظ على العادات دايم ومهتم
والحق والجيره موثق عمدها
كم جاهل من زود عرفه تعلم
جمايله فالناس ماحدن جحدها
اليا اعتزينا فيه شمر وقدّم
يهوى الصعايب و المنايا وردها
ياكيف بعده نهتني يا هل العلم
من بعد موته كيف نسلا بعدها
الموت حق و لا به انسان يسلم
هذا القدر والخلق ربي وعدها
الحزن يجري في عروقي مع الدم
والدمع مثل السيل عالي زبدها
في موت ابو سلمان صفي تألم
و دموعنا يا خوان كلن رصدها
ودعتك الله يالشجاع المخضرم
من شاعرً كل المشاعر حشدها
دعيت لك في جنته دوم تنعم
وتعيش في ظل الجنان ورغدها
و ختامها عهدن علينا وابصم
تبقى حديث اجيالنا يا سندها
ليست هناك تعليقات:
إرسال تعليق